புண்ணியங்களின் பூக்காலம் : ரமலான் வரவேற்பு நிகழ்வின் தொகுப்பு

Feb 6
4 min read

நாள் : 05 பிப்ரவரி 2026

இடம் : அல் இஸ்லாஹ், முஹர்ரக், பஹ்ரைன்

பஹ்ரைன் மண்ணில் கடந்த 25 ஆண்டுகளாகத் தமிழ் பேசும் இஸ்லாமிய மக்களின் வாழ்வியலோடும், ஆன்மீகத்தோடும் பின்னிப் பிணைந்துள்ள தாருல் ஈமான் தமிழ் இஸ்லாமிக் சென்டர், 2026-ம் ஆண்டிற்கான ரமலான் வரவேற்பு நிகழ்ச்சியை "புண்ணியங்களின் பூக்காலம்" என்ற தலைப்பில் மிகப்பிரம்மாண்டமாக நடைபெற்றது, அல்ஹம்துலில்லாஹ். அரங்கம் நிறைந்த மக்கள் கூட்டமும், இணையதளம் வாயிலாக வளைகுடா நாடுகள் மற்றும் இந்தியாவிலிருந்தும் இணைந்து இந்த நிகழ்வை சிறப்பித்தார்கள்.

1. இறைவசனங்களின் ஒளியில் துவக்கம்...

நிகழ்வின் புனிதத் துவக்கமாக இளம்பிறை மாணவர் யஹ்யா பின் அப்துல் ரவூஃப் அவர்கள், 'சூரா அல்-கத்ர்' அத்தியாயத்தை அதன் கம்பீரம் குறையாமல் ஓதினார். "மாட்சிமைமிக்க அந்த இரவு ஆயிரம் மாதங்களை விடச் சிறந்ததாகும்" என்ற இறைவசனத்தின் பொருள், அரங்கில் இருந்த ஒவ்வொருவர் மனதிலும் ரமலானின் மகத்துவத்தை அந்த விநாடியே விதைத்தது.

2. தலைமை உரை: தஃக்வா எனும் கவசம்

மண்டல பொறுப்பாளர் சகோதரர் அன்வர் சாதத் அவர்கள் தனது உரையில், ரமலான் என்ற சொல்லின் வேர் சொல்லான "சுட்டெரிப்பது" என்பதன் பின்னணியை விளக்கினார். கோடை வெயில் எப்படிப் புற்களைச் சுட்டெரிக்கிறதோ, அதுபோல ரமலான் நம் பாவங்களைச் சுட்டெரிக்க வேண்டும் என்றார். "உடலைப் பட்டினி போடும் நாம், நம் உள்ளத்தையும் தீய எண்ணங்களிலிருந்து பட்டினி போடுகிறோமா?" என்ற அவரது கேள்வி சிந்திக்கத் தூண்டியது. நோன்பு என்பது போர்க்களத்தில் ஒரு வீரனைப் பாதுகாக்கும் 'கேடயம்' போன்றது; அது நம்மைத் தீமைகளிலிருந்து பாதுகாக்க வேண்டும் என்பதே அதன் இலக்கு என அவர் தெளிவுபடுத்தினார்.

3. சிறப்புரை: "புண்ணியங்களின் பூக்காலம்" - மௌலவி முஹம்மத் நூஹ் மஹ்ழரி

திருச்சி அஸ்ஸலாம் கல்லூரியின் பேராசிரியரும், புகழ்பெற்ற இஸ்லாமிய அறிஞருமான மௌலவி முஹம்மத் நூஹ் மஹ்ழரி அவர்களின் உரை, வெறும் சொற்பொழிவாக இல்லாமல், ஒரு வாழ்வியல் பயிற்சியாக அமைந்தது. அதன் விரிவான தொகுப்புகள் இதோ:

காலத்தின் மதிப்பும் மூன்று சகோதரர்களின் கதையும்:
- மௌலவி அவர்கள் ஒரு வியக்கத்தக்க வரலாற்றைக் கூறி உரையைத் தொடங்கினார். நபி (ஸல்) காலத்தில் மூன்று சகோதரர்களில் இருவர் போர்க்களத்தில் வீரமரணம் அடைந்தனர். ஆனால், சில காலம் கழித்துச் சாதாரணமாக மரணமடைந்த மூன்றாவது சகோதரருக்கே சொர்க்கத்தில் உயர்ந்த அந்தஸ்து கிடைத்தது. இதைக் கண்டு வியந்த தோழர்களுக்கு நபி (ஸல்) அளித்த விளக்கம் மிக முக்கியமானது: "அவர் அந்த இருவரை விட அதிக காலம் வாழ்ந்து, அதிக ரமலான்களை அடைந்து, அதிக ஸஜ்தாக்களைச் செய்தாரே, அதுவே அவரை உயர்த்திவிட்டது." இதன் மூலம், நமக்குக் கிடைக்கும் ஒவ்வொரு ரமலானும் நாம் சொர்க்கத்தின் படிக்கட்டுகளில் உயருவதற்கான 'போனஸ்' காலம் என்பதை அவர் வலியுறுத்தினார்.
நோன்பு: இறைவனுக்கும் அடியாருக்கும் இடையிலான ரகசியம்:
- தொழுகையையோ அல்லது ஜக்காத்தையோ பிறர் பார்க்க முடியும், ஆனால் நோன்பு என்பது முற்றிலும் ஒரு தனிமனித ரகசியம். "ஒருவர் தனி அறையில் தாகத்தோடு இருந்தாலும், யாருமே பார்க்காத நிலையிலும் ஒரு சொட்டு நீர் அருந்த மாட்டார். காரணம், இறைவன் பார்க்கிறான் என்ற அந்தத் தூய 'தஃக்வா' தான்." இதனால்தான் அல்லாஹ், "நோன்பு எனக்கானது, நானே அதற்கு நேரடியாகக் கூலி வழங்குகிறேன்" என்று பெருமிதத்துடன் கூறுவதாக மௌலவி விளக்கினார்.
சோம்பலின் மாதமா? அல்லது வீரியத்தின் மாதமா?:
- இன்று ரமலான் மாதம் "கஞ்சி மாதம்" என்று சுருக்கப்பட்டு, சமையலறைகளிலும், உறக்கத்திலும் கழிக்கப்படுவதைக் குறித்து அவர் தனது ஆதங்கத்தைப் பதிவு செய்தார். "உணவுக்கான பட்ஜெட் குறைய வேண்டிய மாதத்தில் அது பல மடங்கு கூடுகிறது. இதுவா ரமலான்?" என்று அவர் கேட்டார். இஸ்லாமிய வரலாற்றில் பத்ருப் போர், மக்கா வெற்றி, சிந்து நதிப் போர் மற்றும் ஸ்பெயின் வெற்றி என அனைத்து மாபெரும் புரட்சிகளும் ரமலானில்தான் நிகழ்ந்தன. எனவே, இது உடல் சோர்ந்து போவதற்கான மாதம் அல்ல, ஆன்மா வீறுகொண்டு எழுவதற்கான மாதம் என்பதைத் தெளிவுபடுத்தினார்.
ஹலால் மற்றும் ஹராம் பயிற்சி:
- "பகல் பொழுதில் உங்களுக்கு அனுமதிக்கப்பட்ட (ஹலால்) உணவு மற்றும் உறவை அல்லாஹ் தடுக்கிறான். அல்லாஹ்வின் ஒரு கட்டளைக்காக அனுமதிக்கப்பட்டவற்றையே நம்மால் விட முடிகிறது என்றால், அல்லாஹ் நிரந்தரமாகத் தடுத்த பொய், புறம், வஞ்சகம், வட்டி மற்றும் கோபத்தை ஏன் நம்மால் விட முடியவில்லை?" என்ற வினாவை எழுப்பினார். ரமலான் என்பது தடுக்கப்பட்டவற்றைத் தவிர்ப்பதற்கான ஒரு 'தீவிரப் பயிற்சி முகாம்' என்று அவர் வர்ணித்தார்.
சமூக மாற்றம் மற்றும் உறவுகளைப் பேணுதல்:
- நோன்பு என்பது தனிப்பட்ட வணக்கம் மட்டுமல்ல, அது சமூகத்தைச் சீர்ப்படுத்தும் கருவி. "முப்பது நாட்கள் நோன்பு இருந்தும், ஒருவன் தன் நாவைக் கட்டுப்படுத்தவில்லை என்றால், அவன் பசித்திருப்பதில் அல்லாஹ்வுக்கு எந்தத் தேவையும் இல்லை." மூன்று நாட்களுக்கு மேல் பகைமை பாராட்டுவதும், உறவுகளைத் துண்டிப்பதும் நோன்பாளியின் பண்பு அல்ல. நோன்பு முடிந்து வெளியே வரும்போது ஒரு முஸ்லிம் வட்டி வாங்காதவராக, பொய் பேசாதவராக, பிறரைத் துன்புறுத்தாதவராக ஒரு புதிய மனிதனாகப் பிறக்க வேண்டும் என்பதே ரமலானின் வெற்றி என்றார்.
லைலத்துல் கத்ர் - எங்கே தேடுவது?:
- ஆயிரம் மாதங்களை விடச் சிறந்த அந்த மகத்தான இரவை மக்கள் வெறும் பள்ளவாசல்களிலும், தொழுகை விரிப்புகளிலும் மட்டுமே தேடுகிறார்கள். ஆனால் மௌலவி அவர்கள் ஒரு புதிய கோணத்தை முன்வைத்தார்:
  1. பெற்றோரின் திருப்தியில் அந்த இரவைத் தேடுங்கள்.
  2. உறவுகளைப் பேணுவதில் அந்த இரவைத் தேடுங்கள்.
  3. ஏழைகளுக்கு உதவுவதிலும், அநீதி இழைக்கப்பட்டவர்களுக்கு ஆதரவாக நிற்பதிலும் அந்த இரவைத் தேடுங்கள்.
  4. சுயபரிசோதனை செய்வதில் அந்த இரவைத் தேடுங்கள்.
இறுதி எச்சரிக்கையும் பிரார்த்தனையும்:
- வானவர் ஜிப்ரீல் (அலை) அவர்கள், "ரமலானைப் பெற்றும் தன் பாவங்களை மன்னிக்கச் செய்து கொள்ளாதவன் நாசமாகட்டும்" என்று பிரார்த்தித்தபோது, கருணையின் தூதர் நபி (ஸல்) அவர்கள் "ஆமீன்" என்று சொன்னதை நினைவுறுத்தி, அந்தப் பட்டியலில் நாம் இடம்பெற்று விடக்கூடாது என்று உணர்ச்சிப்பூர்வமாக உரையை நிறைவு செய்தார்.

4. நிகழ்வின் நிறைவு: சகோதரர் அப்துல் அஹத்

நிகழ்ச்சியின் சிகரமாக அமைந்த ஆன்மீகச் சொற்பொழிவுகளுக்குப் பிறகு, தாருல் ஈமான் தமிழ் இஸ்லாமிக் சென்டரின் சார்பாக சகோதரர் அப்துல் அஹத் அவர்கள் தனது நிறைவுரையை வழங்கினார். அவரது உரை ஒரு நன்றியறிதலாக மட்டுமன்றி, சமூக வளர்ச்சிக்கான ஒரு வழிகாட்டுதலாகவும் அமைந்தது.

1. இதயபூர்வமான நன்றிகள்

சகோதரர் அப்துல் அஹத் அவர்கள், இந்த நிகழ்வு மிகச்சிறப்பாக நடைபெற ஒத்துழைத்த அனைவரையும் மனதாரப் பாராட்டினார்:

சிறப்பு விருந்தினருக்கு நன்றி: தமிழகத்திலிருந்து வருகை தந்து, ரமலான் குறித்த ஆழமான சிந்தனைகளை வழங்கிய மௌலவி முஹம்மத் நூஹ் மஹ்ழரி அவர்களுக்குத் தனது நன்றிகளைத் தெரிவித்துக் கொண்டார்.
- ஒருங்கிணைப்பாளர்கள் மற்றும் தன்னார்வலர்கள்: கடந்த பல வாரங்களாக இந்த நிகழ்ச்சிக்காகத் திட்டமிட்டு உழைத்த தாருல் ஈமான் நிர்வாகிகள் மற்றும் தன்னார்வலர்களின் சேவையை அவர் நினைவு கூர்ந்தார்.
- பங்கேற்பாளர்கள்: நேரில் வந்திருந்த பஹ்ரைன் வாழ் தமிழ் மக்களுக்கும், இணையதளம் வாயிலாக உலகெங்கிலும் இருந்து இணைந்திருந்த பார்வையாளர்களுக்கும் தனது நன்றியைப் பதிவு செய்தார்.

2. ரமலான்: குர்ஆனுடனானத் தொடர்பு

அவரது உரையில் ரமலான் மாதத்தின் முக்கியத்துவத்தை ஒரு புதிய கோணத்தில் வலியுறுத்தினார்:

குர்ஆன் மாதம்: ரமலான் என்பது வெறும் பசித்திருக்கும் மாதம் மட்டுமல்ல, இது திருக்குர்ஆன் அருளப்பட்ட மாதம். எனவே, ஒவ்வொரு இல்லத்திலும் குர்ஆன் ஓதப்பட வேண்டும் என்று கேட்டுக்கொண்டார்.
ரமலான் நேரத்தை வீணான பேச்சுக்களிலும், சமையலறையில் மட்டுமே செலவிடாமல், வணக்க வழிபாடுகளிலும், குர்ஆன் ஓதுவதிலும் அதிக நேரத்தை ஒதுக்க வேண்டும் அன்பான வேண்டுகோள் விடுத்தார்.

3. தாருல் ஈமானின் கல்வி மற்றும் சமூகப் பணிகள்

அமைப்பின் கீழ் நடைபெற்று வரும் பல்வேறு செயல்பாடுகளில் மக்கள் தங்களை இணைத்துக்கொள்ள வேண்டும் என அவர் அழைப்பு விடுத்தார்:

வாராந்திர வகுப்புகள்: பஹ்ரைனின் மனாமா, ஹூரா, முஹர்ரக் மற்றும் ரிஃபா ஆகிய பகுதிகளில் வாராந்திர வகுப்புகள் நடைபெறுவதைச் சுட்டிக்காட்டி, மார்க்க அறிவைப் பெற இவை ஒரு சிறந்த தளம் என்றார்.
இளம்பிறை மதரஸா: நமது குழந்தைகளின் எதிர்காலத்தை இஸ்லாமிய நெறியில் செதுக்க, மதரஸா கல்வியின் அவசியத்தை வலியுறுத்தினார்.
தமிழ் மொழி வகுப்புகள்: நம் கலாச்சாரத்தையும் தாய்மொழியையும் அடுத்த தலைமுறைக்குக் கொண்டு செல்லச் சனிக்கிழமைதோறும் நடத்தப்படும் தமிழ் வகுப்புகளில் குழந்தைகளைச் சேர்க்குமாறு பெற்றோரை ஊக்கப்படுத்தினார்.

4. மார்ச் 6: மாபெரும் இப்தார் நிகழ்வு

நிகழ்ச்சியின் முக்கிய அறிவிப்பாக, எதிர்வரும் மார்ச் 6-ம் தேதி (வெள்ளிக்கிழமை) நடைபெறவுள்ள இப்தார் (நோன்பு துறப்பு) நிகழ்வு குறித்து அறிவித்தார். இதில் பஹ்ரைன் வாழ் தமிழ் மக்கள் அனைவரும் தங்கள் குடும்பத்தோடு பங்கேற்றுச் சகோதரத்துவத்தை வளர்க்க வேண்டும் என அழைப்பை விடுத்து அழகிய பிரார்த்தனையுடன் நிகழ்ச்சியை அவர் நிறைவு செய்தார்.

தகவல்

முஹம்மத் யூசுஃப், ஊடகத்துறை

தாருல் ஈமான் - தமிழ் இஸ்லாமிக்சென்டர், பஹ்ரைன்

Photo Gallery